پەیامی هاوڕێ فەرهاد عەزیزی کەڵهور ئەندامی کومیتەی ناوەندی کۆمەڵە روو بە خەڵکی تێکۆشەری کوردستان
مەردم تێکۆشەر کوردستان
ڕاپەڕینتان, هاودەنگی و یەکگرتنتان، “مان گرتنتان” پیرۆز بوو.
کورد زیاتر لە یەک سەدەس، وەرانوەر وە نکۆڵی هویەت و شوناس نەتەوەیی خوەی، پا داسەوگەز و ئویشدن: ئەی داگیرکەرەیل کوردستان، چەودان بکەنەو، بوینن کە لە سەر ئی خاکە نەتەوەیگ ژیەیدن وە ناو نەتەوەی کورد بەڵام، داگیرکەر هەرگیز چەو بینن ئیمە نەیاشتیەو نەیری. ئەوان سەدان ساڵ فرەڕەنگی و دەوڵەمەنی زوان و کولتوورمان چوی چەکیک کوشەندە دژ وە یەکیەتی نەتەوەییمان و لە ڕاستای تاواندنەوە و ئاسمیلە کردن و یەکسانسازی بردنەسەو کار بەڵام، لە جمشت ژینا و لە جمشت ئی کەشیشە هوشیاری نەتەوەیی مەردم کورد، گشت پیلان و نەخشەیل داگیرکەرەیل پویچەڵەو کرد و وەت: ئەی مەردم جهان، ئەی داگیرکەرەیل کوردستان، بزانن و بوینن کە لە سەر ئی خاکە، نەتەوەیگ ژیەیی، کە زیاتر لە سەد ساڵە لە نوای چەو ئیوە جەنگ مان و نەمان خوەی کەیدن و رووژ وە ڕووژ ئرادە و خواست ئازادیخوازانەیان زیاتر گەشە سیندن و باڵاڕنی. ئێوە وە بەشدار کردن لە (مان گرتن ١٨ وەفرانوار)، نیشانداین کە خوەشەویستی و ڕێز هێزەیل سیاسی کورد لە ناو دڵ جەماوەر ڕۆژهەڵات کوردستانە و ئەڕا هەجوورە پشتیوانی و هاوڕاییگ ئامادەین. وە دەنگەو هاتن ئیوە و سەرخستن “مانگرتن سەراسەری” لە پێەک رووژهەڵات کوردستان، ئەرک سەرشان هێزەیل سیاسی قورستر کردیە و ئەوە خوازی کە ڕێز لە فرەڕەنگی و فرە حیزبی کوردستان بگرن و زیاتر یەکدەنگ و هاوبڕیار بوون. ئەگەر لەی کەشەی هەستیار و حساسە گوفتمان یەکتر قەبوول کردن و ڕێزگرتن لە ناو خوەمان باڵابڕنی، نەتەوەگەمان تویەنی شکۆ و گەورەییگ کە لە درێژایی مێژوو داشتیەسەی و دەوڵەت نەتەوەیل تورک و فارس و عەرەب خواست لەناوبردنی داشتن، سەر لە نوو وەدەسباری. جاریگ ترەک سپاس ئەڕا هاودەنگی و هاوڕاییتان. سەرکەفتن و ئازادی ئەڕا کوردستان.
فەرهاد عەزیزی کەڵهوڕ – ئەندام کومیتەی ناوەندی کۆمەڵەی زەحمەتکێشان کوردستان
