ماڵئاوایی تێکۆشەری له مێژینەی بزووتنەوەی چەپ و شۆڕشگێڕانە و هاوڕێی دێرینی کۆمەڵە، هاوڕێ عەبدوڵڵا شاڵچی ناسراو به عەبە تاران
هاوڕێ عەبە تاران له تێکۆشەرانی لەمێژینەی چەپ و سوسیالیستی، دوای هێرشی ڕژیمی کۆماری ئیسلامی بۆ سەر کوردستان، له گەڵ دوو برای دیکەی زیندوویادان بێهروز فارس و مەمەد فارس (بێهروز فارس زستانی ١٣٦٧ی هەتاوی له بۆتێ کۆتایی به ژیانی خۆی هێنا و مەمەد فارس ساڵی ١٤٠٢ی هەتاوی له کانادا ماڵئاوایی له ژیانکرد) گەیشتنە کوردستان و تێکەڵ به ریزەکانی کۆمەڵە بوون.
هاوڕێ عەبە تاران تێکۆشەرێکی زانا بوو که له بواری تیئۆری و باسی سیاسی ساحیب قسە و لێکدانەوە و گوتاری تایبەت به خۆیی بوو. زۆر بوێر بوو له دەڕبڕینی هەڵوێستە سیاسی و هزریەکانی و لەمبارەوە بەرچاو و ناسراو بوو.
جێی ئاماژەدانه هاوڕێ عەبه تاران، لە سەردەمی ڕژیمی پاشایەتیشدا زیندانیی سیاسی بووه و بە هێز و کۆڵنەدانێکی نموونەیی، خۆڕاگری خۆی لە بەرامبەر سەرکوتی سیاسی ئەو رژیمەشدا نیشان دا. ساڵانێک بەرگەگرتنی گوشار و سەختییەکانی زیندان نەک ئیرادەی پۆڵایینی ئەم هاوڕێیەمانی کەم نەکردەوە، بەڵکوو بڕیار و ویستی بۆ درێژەدان بە خەبات و داکۆکیکردن لە مافەکانی خەڵکی چەوساوە و بندەست، و پێشخستنی ئامانجەکانی بزووتنەوە پێشکەوتنخوازەکان بەهێزتر کرد.
بەداخەوە هاوڕێ عەبدوڵڵا شاڵچی تەبریزی ناسراو بە عەبە تاران دوای دەیان ساڵ خەبات و تێکۆشان ئەمڕۆ ٣ی بەفرانباری ١٤٠٤ی هەتاوی بەهۆی نەخۆشییەوە لە ولاتی سوئید ماڵاوایی لە ژیان کرد و کۆڕی هاوڕێیان و دۆستانی بۆ هەمیشە بەجێهێشت.
ناو و یادی هاوڕێ عەبە تاران و براکانی بێهروز و مەمەد فارس بۆ هەمیشە له ریزەکانی کۆمەڵە به خۆشەویستی دەمێنێتەوە.
سکرتارییەتی کۆمەڵەی زەحمەتکێشانی کورستان
٣ی بەفرانباری ١٤٠٤ی هەتاوی
٢٤ی دێسامبری ٢٠٢٥ی زایینی
