برای گیانبەختکردوویەکی کۆمەڵە لە شاری سنە، ماڵئاویی لە ژیان کرد
بە پێی هەواڵێک کە بە ناوەندی ڕاگەیاندنی کۆمەڵە گەیشتووە، ئەمڕۆ یەکشەممە ڕێکەوتی ٢٧ی ڕەزبەری ساڵی ١٤٠٤ی هەتاوی، کاک موراد موزەفەری برای هاوڕێ و هاوسەنگەری گیابەختکردووی ناو ڕێزەکانی کۆمەڵە، هاوڕێ “سديق موزەفەری” ناسراو بە سەدیق ئارپیجی لە تەمەنی ٧١ ساڵیدا بە هۆی نەخۆشی، ماڵئاوایی لە ژیان کردووە.کاک موراد موزەفەری کەسایەتێکی زۆر خۆشەویست و سیمایەکی یەکجار دیار و جێی متمانەی خەڵکی شاری سنە و دەوروبەری بوو.
مەرگی کاک مورادی خۆشەویست خەم و پەژارەیەکی زۆری خستە ناودڵی خەڵکی شاری سنە و سەرجەم دۆست و هاوڕێیانی بە تایبەتی ئەو کەسانەی کە لە نزیکەوە دەیانناسی و شاهیدی هەڵوێست و روانینی دڵسۆزانەی ئەو بوون.
جێگەی ئاماژەیە هاوڕێ سەدیق موزەفەری ناسراو بە (سدیق ئارپیجی) برای کاک موراد ، ساڵی ١٣٣٧ی هەتاوی لەشاری سنە لە بنەماڵەیەکی دلسۆز و ناسراوی شارەکە لە دایک بوو. هاوڕێ سديق لە تێکۆشەرانی دێرینی شاری سنە بوو و وێڕای خەڵکی تێکۆشەری ئەو شارە لە خۆپیشاندان و راپەڕینی خەڵکی ئێران بە دژی ڕژیمی پاشایەتی بەشداریی چاڵاکانەی کرد .دوای ڕاپەڕینی گەلانی ئێران پەیوەندی بە کۆمەڵەوە گرت و وەک تێکۆشەرێکی ڕاستەقینە و شێلگیر دەستی کرد بە چالاکی سیاسی. هاوڕێ سديق لە درێژەی هەڵسووڕانیدا پەیوەست بوو بە ڕیزەکانی هێزی پێشمەرگەی کۆمەڵە و چەکی پڕ لە شانازی کۆمەڵەی کردە شان و لە شاری سنە وێڕای پێشمەرگە قارەمانانەکانی کۆمەڵە لە سەنگەری شۆڕشگێرانەی کوردستان دژی داگیرکەرانی کوردستان خەباتی کرد و دەیان و سەدان حەماسەی بێ وێنەی لە خۆی نیشاندا.
بەداخەوە ئەم تێکۆشەرە قارەمانە و ئەم سیما خۆشەویستەی ناو ریزەکانی کۆمەڵە، ڕۆژی ٣ی مانگی گوڵانی ساڵی ١٣٦٤ی هەتاوی لە میلەمەرزی شلێر لە ناوچەی مەریوان لە سەرەتاکانی دەستپێکی شەڕی بە زۆر داسەپاوی ناوخۆیی بە سەر کۆمەڵەدا ، گیانی ئازیزی لە پێناو ئامانجە بەرزەکانی کۆمەڵەدا بەخت کرد و درێژەی ڕێگای بە ئێمە ڕێبوارانی ڕێگای ئامانجە پیرۆزەکانی سپارد .
لە لایەن ناوەندی ڕاگەیاندنی کۆمەڵەوە، پرسە و سەرەخۆشی گەرمی خۆمان ئاراستەی بنەماڵەی کاک موراد موزەفەری و هەموو دۆستان و خۆشەویستان و خەڵکی تێکۆشەر و بە ئەمەگ و دڵسۆزی شاری سنە و دەوروبەری دەکەین و خۆمان بە هاوبەشی خەم و پەژارەیان دەزانین.
ناوەندی ڕاگەیاندنی کۆمەڵەی زەحمەتکێشانی کوردستان
