بەڕێزە یاد و ناوی خاتوو شادی مەعارفی
بە داخ و کەسەرێکی زۆرەوە ئاگادار کراینەوە کە دوێنێ شەو ٢٤ی خەرمانانی ١٤٠٤ی هەتاوی، خاتوو شادی مەعارفی، خۆشکی ئازارچێشتووی هاوڕێی گیانبەختکردووی نێو ڕیزەکانی کۆمەڵە شێرکۆ مەعارفی، دوای ماوەیەک ململانێ لەگەڵ نەخۆشی، دڵی پڕ هیوا و کەیلی بە ئازادی بۆ هەمیشە لە لێدان کەوت.خاتوو شادی ئەو ژنەی کە ساڵانێک تەمەنی لە ژێر سێبەری ڕەشی ئێعدامی براکەیدا و لە ململانێ لەگەڵ نەخۆشی و مەینەت بەسەر برد، بەڵام هەر وەک براکەی سمبولی خۆڕاگریی و بەرخۆدان بوو، شەوی ڕابردوو بەهۆی نەخۆشییەوە لە شاری سەقز ماڵاوایی لە ژیان کرد.
تەرمی خاتوو شادی دوێنێ شەو لە گۆڕستانی ئایچی لە سەقز بە بەشداریی کەسوکاری و لە کەشێکی ئەمنییەتیدا بە خاک نێژرا، و بە وتەی یەکێک لە ئامادەبووانی سەر قەبران، نزیکەی بیست مەئمووری ئیدارەی ئیتلاعات لەوێ بوونه و بە خەڵکیان ڕاگەیاندووە کە ئەمڕۆ کەس بۆی نییه سەردانی گۆڕستانی ئایچی بکات.
شیرکۆ مەعارفی یەکێک لە پێشمەرگه ئازا و جەسوورەکانی کۆمەڵه بوو کە ڕێکەوتی ٩ی خەزەڵوەری ١٣٨٧ی هەتاوی کاتێک کە بۆ جێبەجێکردنی چالاکیەکی تەشکیلاتی گەڕابووەوە ڕۆژهەڵاتی کوردستان، لە یەکێک لە ئاواییەکانی سەقز لە لایەن هێزەکانی سپای پاسدارانەوە دەستبەسەر کرا و دوای ٥ ساڵ خۆڕاگریی و نواندنی سیمایەکی قارەمانانە لە نێو سیاچاڵەکانی کۆماری ئیسلامی لە ڕێکەوتی ١٣ی خەزەڵوەری ١٣٩٢ی هەتاوی لە شاری سەقز لە سێدارە درا.
ناو و یادەوەریی ئەم بنەماڵە سەربەرزە هەمیشە بەستراوەتەوە بە بەرخۆدان و بوێریی و ئەو باجە قورسەی کە بۆ ئازادی داویانە.
لێرەوە بە ناوی ڕاگەیاندنی کۆمەڵەوە سەرەخۆشی و پرسەی خۆمان ئاراستەی بنەماڵەی سەربەرزی مەعارفی و کەسوکار و هەموو خەڵکی ئازادیخوازی کوردستان دەکەین و خۆمان بە شەریکی خەم و پەژارەیان دەزانین.
کۆمیسیۆنی ڕاگەیاندنی کۆمەڵەی زەحمەتکێشانی کوردستان
٢٥ی خەرمانانی ١٤٠٤ی هەتاوی
١٦ی سێپتامبری ٢٠٢٥ی زایینی
