پێویستە دووپاتی بکەینەوە که بزووتنەوەی ڕزگاریخوازیی کوردستان بزووتنەوەیەکی سیاسی و حەقخوازانەیە که داگیرکەران شەڕ و کوشتاری به سەردا دەسەپێنن و گەلی کوردیش ناچارە بەرگریی چەکداریی له شۆڕشەکەی بکات. کۆمەڵە هەر له سەرەتاوە پێشڕەو و ئەندازیاری خەباتی مەدەنی و سیاسی بووە که ئەوەش بۆ داگیرکەران تەحەمول نەکراوە و هێرشیان کردووەتە سەری. بە هێز بوونی خەباتی سیاسی و مەدەنیی کۆمەڵگەی کوردستان لە سەرووی هەموویدایە. هەرچەن هاوڕێیانی ئێمە بۆ مەبەستێکیتر و ئەرکێکی تەشکیلاتی تووشی ئەو شەڕە بوون و ئازایانە بەرگرییان لە خۆیان کرد و جارێکیتر حەماسەی خۆڕاگری و کۆڵنەدانیان خولقاند. هێزی پێشمەرگە و داهاتووی لە بزووتنەوەی خەڵکی کوردستاندا، بێگومان گرنگی و بایەخی خۆی هەیە و ئەمەش لە بەرچاو دەگرین و دەیپارێزین.
گیانبەختکردنی هاوڕێی ڕێبەر و فەرماندەمان ڕێبوار کەریمیان ناسراو بە ڕێبوار دارسەیران ئەگەرچی خەسارێکی گەورە و کەلێنێکی پڕنەکراوەیە لە نێو هێزی پێشمەرگە، بەڵام ئەو توانی لە شەوەزەنگی چڕدا، گزنگی هیوا و ئومێدی ئاسۆیەکی گەش بۆ ئێمە و نەوەی نوێ بێ. ناو، یاد و فیداکاریی هاوڕێ ڕێبوار بۆ هەمیشە لە دڵی هەموو خەڵکی کوردستان دەمێنێتەوە و چرای گەشی ڕێگامان ئەبێ.
یادی هاوڕێی فەرماندەمان هاوڕێ ڕێبوار بەرز و بەڕێزە و ڕێگای بەردەوامە.
بژی خەباتی ڕەوای خەڵکی کوردستان
