راگەیاندنی سکرتاریەتی کۆمەڵە بە بۆنەی مەرگی دایکی سێ تێكۆشەری گیانبەختكردووی كۆمەڵە
بە داخەوە ئاگادار کراینەوە، سەرلەبەیانی ئەمڕۆ شەممه ٢٤ی سەرماوەزی ١٤٠٣ی هەتاوی لە “نەخۆشخانەی کەوسەر”ی شاری سنە، دایە فەراسەت جەعفەر قشڵاقی دایكی سێ تێكۆشەری گیانبەختكردووی كۆمەڵە و بزووتنەوەی شۆڕشگێڕانەی كوردستان، هاوڕێیان پرشنگ ناسراو بە ئەرخەوان،پەروین ناسراو به کەژاڵ، و نەسرین ڕۆستەم گورجی ناسراو به ویدا، یەکێک لە سیما ناسراو و خۆڕاگرەکانی نێو دایکانی کوردستان دڵی گەورە و پڕلە خۆزگەی بۆ ئازادی و ڕزگاریی بەشمەینەتان، بۆ هەمیشە لە لێدان کەوت.دایە فەراسەت یەکێک لەو دایکە خۆڕاگرانەی شاری سنە بوو کە سێ جگەرگۆشەی لە نێو ریزەکانی کۆمەڵە گیانیان بەختکرد و ئەویش وەک هەزاران دایکی جەرگ سووتاوی کوردستان، خەم وئازاری لەدەستدانی جگەرگۆشەکانی کردە بوورکانی قین و نەفرەت بەڕووی داگیرکەراندا.
جێ ئاماژەیە کە هاورێیان پرشنگ، پەروین و نەسرین سێ کچی ڕچەشکێن و لە هەمانکاتدا لە یەک بنەماڵە بوون کە روویان کردە شۆڕش و تا کاتی گیانبەختکردنیان وەکوو پێشمەرگەی کۆمەڵە لە شۆڕش دژ بە داگێرکەران و کۆنەپەرستان بەردەوام بوون و دیارە کە سیمای بزووتنەوەکە بە وەها بنەماڵەگەلێکەوە بەرەو سیمایەکی یەکسانیخواز و مودێرن گەشەی کرد.
ئێمە لە لایەن هەموو ریزەکانی کۆمەڵەوە پربەدڵ سەرەخۆشی لە بنەماڵە و کەس وکاری دایە فەراسەت و هەموو خەڵکی شاری سنەی سەربەرز دەکەین و خۆمان بە شەریکی خەم و پەژارەیان دەزانین..
یاد و ناوی ئازیزی دایە فەراسەت جەعفەر قشلاقی بە زیندویی دەمێنێتەوە.
سکرتاریەتی کۆمەڵەی زەحمەتکێشانی کوردستان
٢٤ی سەرماوەزی ١٤٠٣ی هەتاوی
١٤ی سێپتامبری ٢٠٢٤ی زایینی
