مشوم بنەمایێ کۆمەڵایەتی پەی هەورامانی مەرزنمێرە

✍دماڕۆ -هەورامان

ڕاو ویرچەموو هەورامانی، نمەکریۆ نامێش بنیەی ناسیۆناڵیزمی هەورامی، و یا پان هۆرامیسم، چوون مەبەست چی راو  ڕاوینیە بە جۆرێ نەجات دای زوانوو فەرهەنگ و ئەرزشەکاو مەحاڵێوەن کە  بە هەزاران ساڵێن چیروو دەسەڵاتە سیاسیەکاو دەورووبەرینە ئی دەسوو ئۆدەس کریان و فەرهەنگوو زوانش و جە گردی گرنگ تەر کێبیەی و شارەستانیەتش چا مەحاڵەنە تووشوو نەوەشی کەردەن، مەبەستما جە ڕاو ویرچەموو هەورامانی ئینەنە کە ئا ویروو ویرچەمێ ئینسانانا، جە ڕاسیگاو هەرمانێ فەرهەنگی و مەدەنیەنە بێ تنووتێژی پسەو بنەمایێ کۆمەڵایەتی پەی هەورامانی مەرزنمێرە، تا تاک و کۆمەڵگاو مەحاڵوو هەورامانی چا ڕاوینەیە پسەو  سۆقاتی پەی ژیوای درۆسی ئیستیفاذە کەرۆ، ڕاو ویرچەمی هەورامیانە مشیۆم، خزمەت بە گردوو ئینسانەکا کەرۆ بە سەرمەشقوو  ژیوایش، مشیۆم کارێ کەرمێ کە ئینسانی هەورامی پتانسیڵوو ئینەیشە بۆنە کە بتاوۆ جە هەورامانەنە گرد ویروو ویرچەمێ جیاواز دلێ وێشەنە بێ تنوو تێژی، بێ جیا  کەردەیوەی ڕەگەزوو ژەنوو پیای ڕا کەرۆوە، ئی هەرمانێچە فەقەت بە وێ ئاگایی خەڵکی و چالاکی فەرهەنگی و مەدەنی وەشە بۆنە، کە مشیۆم گردوو ئێمە پسەو خەڵکوو هەورامانی پسەو ئەرکێ گردینی، و بنەڕەتی، هەرمانە فرەتەر سەروو بوارە جۆرباجۆرەکاو کۆمەڵگایوە کەرمێ، حەر جە نویسەی گێرە تا یاوۆ لاو ئەرەمەرزنای سازمان، و ڕێک وزیایەکا کە هەرمانێ مەدەنیە کەرا، مشیۆم ئا کەسانا کە هەرمانێ فەرهەنگیە کەرا، خەڵکی فرەتەر هان بذا، کە ئاگایی کۆمەڵایەتیشا بەرا سەر، جە وەنەی کتێبی گێرە تا بیاوۆ لاو ئا کۆگا ڕۆشن ویریا کە متاوا جە بواروو وێ ئاگایی هەرمانە کەرا مشیۆم تاکەکاو خەڵکی بێ جیاوازی مەراموو باوەڕیشا بێنێنە دلێ ئا جەما, تا بتاوا فەرهەنگوو دسپلینی کۆمەڵایەتی یا مەرزنایرەی پەیوەندیێ درۆسی و ئاوەزیانە دلێ کۆمەڵگاینە سازنا، بەشداری کەردەی هەورامیەکا دلێ ئەنجمەن و ڕێک وزیایەکانە پسەو ڕێک وزیاو، ژیوگە پارێزی، ڕێک وزیاو حقۆقوو ژەنا، ڕێک وزیاو دژە تنووتێژی، ڕێک وزیاو یارمەتی کۆمەڵایەتی، سازمانە جۆراوجۆرەکا، کە ئارۆ جە راسیگاو حقۆق بەشەریەنە مەرزیاینێرە، پسەو، سازمانوو یارمەتی بە ئاوارەکا، پسەو کومیسیۆنوو یۆنسکۆی،و….. بە پەیوەندی گێرتەی تاکەکاو کۆمەڵگای دلێ ئی ئەنجمەنانە، تاکەکا فێروو ئانەی با کە هۆرزوو نیشت و پەیوەندیەکاشا چنی تاکی وەراوەریشا ڕێکوو پێک کەرا، و حەقوو ئەرکەکاشا جە کۆمەڵگانە تەنزیم کەرا، بە ڕاوینوو من ئی هەرمانێ هەورامانی جە هەر کەموو کۆڕیێ ناجات مذۆنە، مشیۆم هێزیما فرەتەر سەروو نویسەی بە زوانی هەورامی فرە کەرمێ تا زوانی هەورامی پسەو زوانێ زانشتی ئاکادمیک گنۆ ڕا وکۆمەڵگاو هەورامانی چا ڕاگاوە پەیوەندیە زانشتی وکۆمەڵایەتیەکاش وازۆوە پەی وڵاتەکاو تەری، نویسەی بە زوانی هەورامی باشتەرین هەنگامێ ستراتژیکەنە پەی مەرزنایرەی کۆمەڵگایێ مەدەنیێ، ئینەیچ مشیۆم بزانمێ بێ وەرچەم گێرتەی بوارە سیاسیەکاو ئارۆی، وینمێ ئا مللەتا کە فرەتەرین وەڵکۆتەیشا بیەن ، فرەتەرش گاریگەری زوان وفەرهەنگەکەیشا بیەن و جە گردی گرنگتەر ئانە بیەن کە ئەنەئاوەریە کاشا بە زوانوو ئەذایشا نویستێنێ، جە ویربەرزە ئاڵمانیەکاوە گێرە تا ئا ڕومان نویسە گۆرەکاو دونیای هەر یۆشا بە زوانوو وێش نویسەنش و حەر ئینە بیەن بایسوو ئانەی کە تا زوانوو فەرهەنگشا گەشە کەرۆ، و تا زاڕۆڵەکاو دمای وێشا بە سەربەرزیوە ڕاو ڕوینوو گۆرەکاشا ئیدامە بذانێ.