بەرێوەچوونی ئاهەنگی ٨ی مارس لەلایەن چالاکانی ژنانی شاری سنە…!
٭هەواڵنێری ئاسۆ سات لە سنە
سنە – لە ڕۆژی هەینی، ٧ی مارسی ٢٠٢٥، ئاهەنگێک بە بۆنەی ڕۆژی جیهانیی ژن بە بەشدارییەکی بەرچاوی چالاکانی ژن و پیاوان و چەندین خێزانی گیانبەختکردوانی شاری سنە بەڕێوەچوو. ئەم ئاهەنگە بە بانگهێشت و ڕێکخستنی سێ گرووپی یەکێتیی ژنانی کوردستان، چالاکانی مافەکانی ژنانی سنە و چالاکانی مەدەنیی ژنانی سنە ڕێکخرا بوو.
ئاهەنگەکە بە خوێندنەوەیەکی پەیام بە بۆنەی ڕۆژی جیهانیی ژن دەستیپێکرد کە تیایدا تێکۆشانەکانی ژنان بۆ بەدەستهێنانی مافە یەکسانەکان، ئازادی و لابردنی جیاکارییەکان بەرز نرخێندرا. هەروەها لەم پەیامەدا، یاد و بیرەوەری شەهیدانی شۆڕشی ژینا و ژنانی تێکۆشەری دیکە یاد کرا.
بەشداریی شانازیبەخشی دایکانی شەهیدانی شۆڕشی ژینا، دایکانی ئاشتی، خێزانەکانی شەهیدانی پێشمەرگەی حیزبەکانی کوردستان و چەندین خێزانی زیندانییە سیاسییەکان ڕووحێکی تایبەتی بە ئاهەنگەکە بەخشیبوو و هەستی هاوئاهەنگی و تێکۆشانەی هاوبەشی لە ناو بەشداراندا بەهێزتر کرد.
لە بەردەوامیی بەرنامەکەدا، چەندین سروود بە زمانی کوردی و فارسی بە مەبەستی تێکۆشانەکانی ژنان و ئازادیخوازی پێشکەشکران کە بە پێزەوەندیی بەشداران ڕووبەڕوویان بوونەوە.
ئەم ئاهەنگە لە کاتێکدا بەڕێوەچوو کە لە ڕۆژانی ڕابردوودا دەزگا ئەمنییەکان بە بانگکردن و هەڕەشەکردنی چەند چالاکێکی ژن هەوڵیاندا بوو ڕێگری لە بەڕێوەچوونی ئەم کۆبوونەوەیە بکەن. بەڵام، بەشداریی بەهێز و بەرچاوی ژنان و پیاوانی چالاکی مەدەنی و کۆمەڵایەتیی شاری سنە نیشانی دا کە هەوڵە ئەمنییەکان نەیانتوانیوە دەنگی تێکۆشانەکانی ژنان بێدەنگ بکەن.
ئاهەنگی ٨ی مارس بە بەرزکردنەوەی هەستی خۆشی، هەستی تێکۆشانی زیاتر و بە هەوڵدان بۆ بەردەوامبوونی خەبات بۆ مافەکانی ژنان کۆتایی هات.
ڕۆژی جیهانیی ژن نیشانەی یەکێتی، تێکۆشان و بەرگریی ژنانە بۆ ئازادی و یەکسانی.
