نەتەوەی کورد لە بەردەم هەلێکی نوێی ناوچەیی و جیهانی…..

نەتەوەی کورد لە بەردەم هەلێکی نوێی ناوچەیی و جیهانی
دامەزراندنی كۆماری كوردستان لە دووی رێبەندانی ساڵی ١٣٢٤ی هەتاویی (٢٢ی ژانڤیەی ١٩٤٦) بە رێبەری قازی محەمەد لە شاری مەهاباد دەرەنجامی گەشەو پەرەسەندنی بیر و ویستی نەتەوەیی كورد بوو كە لەئەنجامی كرانەوەی بارودۆخی سیاسی و هاوكاتیش خەباتی پێشووتری رێكخراوە سیاسیەكانی كورد لەدژی دەسەڵاتی ملهوڕو سەركوتگەری رەزا شاو ململانێی زلهێزەكان لەناوچەكە وەك دەسكەوتێكی بەنرخی جوڵانەوەی كورد هاتبووە ئاراوە.
پاش سەرکوت کردنی خەبات و تێکۆشانی شێخ مەحموود له باشووری کوردستان و شۆڕشە یەک له دوا یەکەکانی باکوری کوردستان و پاش پیلانگێڕی دژی شۆڕشی سمایل ئاغای سمکۆ، سڕینەوەی پەیمانی سیڤەر و له بەرچاو نەگرتنی نەتەوەی کورد له سایس پیکۆ و لۆزان، ڕاگەیاندنی کۆماری کوردستان شکاندنی شەقڵی بێدەنگی و حاشاکردن له کورد و مافەکانی و دەسپێکی قۆناخی وشیاری سیاسی و نەتەوەیی نه تەنیا له ڕۆژهەڵات که له هەموو بەشەکانی کوردستان بوو.
كۆماری كوردستان وەك دەسكەوتێكی گرنگی ئەو سەردەمە بۆ نەتەوەی كورد لە هەموو بەشەكان ئەزموونێكی بەنرخ و مێژووییە و لە هەمانكاتیش زۆر كەم و كۆڕی هەبووە كە دەكرێ بدرێتە بەر رەخنە و خوێندنەوەیەكی نوێی و زانستی بەمەبەستی وانە لێوەرگرتن و هاوكات دوپات نەكردنەوەی هەڵەو كەم و كوڕییەكان لەپێناو بەهێزكردنی بنەماكانی خەبات و تێكۆشان بۆ ئێستاكەو داهاتووی بزووتنەوەی رزگاریخوازی كورد لەهەموو بەشەكانی. كۆماری كوردستان ئەگەرچی زۆربەی پێكهاتەكانی لە خۆ نەدەگرت و دەسەڵاتە سیاسیەکەی تەنیا لە موکریان بوو، بەڵام زۆر زوو بووە جێی هیوای هەموو تێکۆشەرێکی کورد لە بەشەکانی دیکەش.
بەشداری كردنی بەشەكانی دیكەی كوردستان بە مەبەستی یارمەتی دان و بەهێزكردنی كۆمار و بەتایبەتی هێزەكانی پێشمەرگەی باشووری كوردستان بە سەركردایەتی مەلا مستەفا بارزانی دەرخەری یەكگرتوویی و هاودڵی لەو قۆناغە مێژووییەی كورد بووە كە دەكرێ وەك خاڵێكی گرنگ و جێگەی بایەخ وەسف بكرێت.
ئەمڕۆ پاش ٧٩ ساڵ لە دامەزراندنی كۆماری كوردستان، كورد بە گشتی لە دۆخێكی هەستیار و چارەنووسسازی ناوچەكە و جیهاندایە، حەوتی ئۆكتۆبری ٢٠٢٣ رۆژهەڵاتی ناڤینی جارێكیتر تووشی شەڕ و ئاڵۆزی كرد و بازنەی شەڕ ئاستێكی بەرفراوانتری لە خۆ گرتووە. میحوەری مەقاومەت بە سەركردایەتی كۆماری ئیسلامی ئێران لە ناوچەكە زەبری گەورەی بەركەوتووە وچیتر توانای مانۆڕ و تێرۆری نەماوە.
زلهێزەكانی جیهان و هاوپەیمانانیان له ناوچەکە، خەریكی داڕشتنی پلانی نوێی و سنووری ناوچەكەن و دەرفەتێکیان خولقاندوە کە دەتوانێ بۆ کورد و بەرژەوەندی خەڵكی كوردستان کاریگەر بێت.
رۆژئاوای كوردستان پێگەیەكی تایبەتی لە سوریا بەتایبەت دوای روخانی رژیمی ئەسەد بە دەستهێناوەو جێی سەرنج و پشتیوانی ناوچەیی و جیهانییە. باشوور هاوپەیمانێكی گرنگە بۆیان، كۆی ئاماژەكان دەرخەری ئەوەن كورد ئێستاكە پێگەی لەهەمیشە لە ناوچەكەو جیهاندا بەهێزتر بووەو ئەمەش ئەركی تازە ئەخاتە سەر شانی هێز و لایەنە سیاسیەكانی كورد.
هاوكات لاواز بوونی دەسەڵاتی كۆماری ئیسلامی لە ناوچەكە و لەدەستدانی هاوپەیمانێك وەك سوریە، دۆخی نالەباری ئابووری، سیاسی و كۆمەڵایەتی رژیم لە ناوخۆی ئێرانیش، ئەگەری سەرهەڵدانی دوبارەی ئاخێزی جەماوەری و هەڵپێچانی دەسەڵاتی كۆماری ئیسلامی زیاتر لە هەر كاتێكیتر هەست پێدەكرێت. بۆیە گرنگی هاوپەیمانی و یەكگرتوویی هێز و حیزبە سیاسیەكان زیاتر لە هەمیشە پێویستییەكی حاشاهەڵنەگرە. كەڵك وەرگرتن لە هەل و دەرفەتەكان بۆ نەتەوەی كورد كە هەمیشە كەمترین پاڵپشتی ناوچەیی و جیهانی بووە، ئەركێكی ئەخلاقی و مێژوویی رێبەران و تێكۆشەرانی كوردە.
کۆمەڵەی زەحمەتکێشانی کوردستان
٣٠ی بەفرانباری ١٤٠٣
١٩ی ژانڤیەی ٢٠٢٥ی زایینی